Novas

Máis de 40 persoas participaron na charla celebrada hoxe, xoves, no salón de actos do Concello de Lourenzá dentro da campaña de prevención de atropelos a peóns. Correu a cargo de efectivos da Garda Civil, que explicaron as pautas para pasear coas axeitadas medidas de visibilidade e seguridade, co fin de evitar atropelos nos distintos tipos de estradas.

Lourenzá, 12 de febreiro de 2014. O Concello de Lourenzá aprobou un investimento de 25.420,16 euros para mellorar estradas nas catro parroquias do municipio.

O concelleiro de Obras, Dino Vidal, explicou que a metade do investimento corresponde a fondos propios do Concello e o restante vai con cargo ao Plan de Obras e Servizos da Deputación de Lugo.

Lourenzá, 11 de febreiro de 2014. Dentro do ciclo Febreiro teatreiro, organizado polo Concello de Lourenzá, este domingo 16 actuará o trío Trípode e o día 23 a representación correrá a cargo da compañía O Batán, de Cangas de Foz. Anunciouno hoxe a concelleira de Cultura, Lupe Flórez Seivane.

No día de onte en Villalba a sección de atletismo volveu a ser protagonista positiva obtendo unhos novos resultados históricos que xa non sorprenden pero sí seguen alegrando.

Categoría benxamín feminino:

O equipo formado por Valeria, Diana, Carmen, Antía, María e Aldara proclamouse campión provincial ¡!!

Categoría benxamín masculino:

O equipo formado por Fernando, Manuel, Ian, Brais e David proclamouse Subcampión provincial.

Categoria alevín feminino:

O equipo formado por Ainara, Ana, Hiba, Ainhoa, Carme e Marta; subcampionas provinciais.

Lourenzá, 10 de febreiro de 2014. A alcaldesa de Lourenzá, Emma Álvarez Chao, fixo hoxe unha valoración positiva da participación do concello no Macroentroido celebrado onte en Santiago de Compostela a pesar do mal tempo. A rexedora destacou o éxito que acadou o doce típico do Antroido no municipio, que é coñecido como mazapán.

Lourenzá, 7 de febreiro de 2014. O desfile do Domingo de Piñata e un doce típico do Carnaval no municipio de Lourenzá chamado mazapáns serán dados a coñecer no Macroentroido de Galicia que se celebrará este domingo, día 9, en Santiago de Compostela. O municipio laurentino é o único da Mariña que participará nese evento, no que estarán tamén os Entroidos da Ulla, Cobres, Pobra do Brollón, Chantada, Xinzo de Limia, Manzaneda, Maceda e de Portas de Galicia.

Lourenzá, 6 de febreiro de 2014. O secretario xeral para o Deporte da Xunta de Galicia, José Ramón Lete Lasa, estivo hoxe en Lourenzá e felicitou ao Concello polo seu traballo na promoción do deporte e no fomento da vida sa. Lete Lasa, que estivo acompañado polo responsable provincial do departamento autonómico de Deportes, Manuel Otero Cadramón, reuniuse coa alcaldesa de Lourenzá, Emma Álvarez Chao, e co concelleiro de Deportes, Pablo Maseda.

Lourenzá, 6 de febreiro de 2014. O salón de actos da Casa do Concello de Lourenzá acollerá unha charla sobre a prevención de atropelos a peóns o vindeiro xoves, día 13, ás once e media da mañá. Os asistentes recibirán de agasallo un chaleco reflectante.

No acto daranse pautas para pasear coas axeitadas medidas de visibilidade e seguridade co fin de evitar atropelos nos distintos tipos de vías.

A charla está organizada pola Dirección General de Tráfico do Ministerio del Interior, pola Guardia Civil de Tráfico e polo Concello de Lourenzá.

Lourenzá, 5 de febreiro de 2014. A Concellería de Cultura de Lourenzá organiza un ciclo teatro denominado Febreiro teatreiro, que se desenvolverá os domingos 9, 16 e 23 deste mes no salón de actos da Casa do Concello. A representación deste vindeiro domingo será ás sete da tarde e correrá a cargo da compañía da asociación VEA, de Barreiros, que ofrecerá a obra Curtas humorísticas. O prezo da entrada é de un euro.

Lourenzá, 4 de xaneiro de 2014. Lourenzá participará no macroentroido que se celebrará en Santiago de Compostela este vindeiro domingo, día 9 de febreiro, organizado pola Axencia de Turismo de Galicia, evento no que participarán os Carnavais máis famosos da comunidade autónoma. O Concello e a asociación de comerciantes, industriais e autónomos de Lourenzá (ACIAL) darán a coñecer o desfile do Domingo de Piñata e os atractivos do municipio.