Novas

As boas condicións meteorolóxicas axudaron para que a Festa do Maio celebrada onte en Vilanova de Lourenzá contara con moita afluencia de público.
A concelleira de Cultura, Lupe Flórez Seivane, agradeceu “a colaboración desinteresada dos veciños que participaron o mércores na ornamentación do Maio e o carro e onte agasallando con lambetadas aos nenos e nenas que acompañaban o desfile. Tamén aos membros da Escola Municipal de Música e Danza Osorio Gutiérrez, que animaron o percorrido coa súa música e cantos”.

Os vindeiros 10 e 11 de Maio disputarase no Pavillón Municipal de Lourenzá o Play Off de Ascenso para buscar unha praza entre os equipos clasificados do 2º ó 5º que dispute o Ascenso a Nacional xunto co Universidade de Salamanca.
O sábado 10 de maio serán as semifinais ás 17:00 e 19:00 horas.
O domingo 11 de mario será a final ás 12:30 horas e o 3º/4º posto ás 10:30 horas.
Tan pronto teñamos o luns os emparexamentos serán publicados!!!

O Venres día 30 de maio Lourenzá vestirase de gala para acoller a saída e a primeira etapa da Volta Ciclista ás Comarcas. A presentación de equipos será no Cantón ás 12:30, a saída está programada para as 14:00 horas e a chegada está prevista tamén no Cantón ó redor das 17:30 horas.

Este pasado sábado día 27 a Asociación de Sendeirismo Terras de Lourenzá viaxou ata o Concello de Riveira para disfrutar da Ruta do Faro. A ruta discorreu dende o Dolmen de Axeitos ata o Faro de Corrubedo un percorrido duns 12 km cunhas vistas espectaculares, unha combinación de monte e mar que permite disfrutar da natureza no seu estado máis puro. Logo de repoñer forzas nun restaurante da zona, subimos ata a Pedra da Ra para volver a disfrutar doutras espectaculares vistas.

A Festa do Maio celebrarase este xoves co tradicional percorrido polas rúas de Vilanova, que empezará ás 16:30 horas e no que A Madalena, que nesta ocasión foi elixida por sorteo, será a rapaza laurentina Fátima Reino Reigosa. Despois do desfile haberá unha representación teatral no salón de actos da Casa do Concello.

O salón de actos da Casa do Concello de Lourenzá estivo onte, domingo, ateigado de público que asistiu ao concerto do Grupo de Acordeóns do Conservatorio Profesional de Música de Viveiro, formación dirixida polo laurentino Lino Rico e que conta con músicos de 8 a 80 anos de idade. A actuación foi organizada pola comisión de festas de Santa Cruz 2014 coa colaboración do Concello de Lourenzá.

O concello de Lourenzá acolleu un taller de prevención de riscos laborais en explotacións de horta, actividade promovida polo Instituto Galego de Seguridade e Saúde Laboral (ISSGA), da Consellería de Traballo e Benestar, da Xunta de Galicia. Participaron unha vintena de persoas, titulares de explotacións gandeiras e de horta, que abordaron os perigos máis frecuentes aos que se soen afrontar no seu día a día para tratar de poñerlles solución, coa axuda dunha técnica en prevención de riscos laborais.

O Concello de Lourenzá celebrou o Día do Libro cos alumnos do CEIP Juan Rey, que asistiron onte a un espectáculo para fomentar a lectura.

A Madalena para o Desfile do Maio que se celebrará o vindeiro día 1 polas rúas de Vilanova de Lourenzá elixirase nesta ocasión por sorteo entre as nenas e rapazas do concello con idades comprendidas entre 10 e 17 que se presenten. O prazo remata este venres, 25 de abril.

A biblioteca pública municipal de Lourenzá convoca a fase local do certame de narración e debuxo Letras Galegas 2014, no que poden participar nen@s e rapaces de ata 16 anos. O prazo para presentar os traballos remata o día 9 de maio.
A tema proposto nesta edición do certame é Cociñando Contos e hai tres categorías: ata 8 anos, de 9 a 11 anos e de 12 a 16 anos. O fallo do xurado local farase público antes do Día das Letras Galegas.