Residentes en el lugar de Canedo quieren recuperar ese topónimo desaparecido en el año 1996. El gobierno municipal hará gestiones para intentar conseguirlo si la mayoría de los dos vecinos están a favor

Lourenzá, 22 de xuño de 2013. Algúns veciños do lugar de Canedo pediron á alcaldesa de Lourenzá, Emma Álvarez Chao, a recuperación dese topónimo que desapareceu no ano 1996. Por este motivo o goberno municipal fará xestións para intentar conseguilo se a maioría dos veciños están a favor.

“Tras recibir varias peticións dos veciños do lugar de Canedo de recuperar o topónimo desaparecido xa dende o ano 1996 no nomenclátor de Estadística considerei oportuno dirixirme aos presidentes das asociacións de veciños de Santo Tomé e de San Adriano, posto que o lugar de Canedo está conformado por parte do territorio dunha e doutra parroquia, para manter unha xuntanza conxunta con todos os residentes neste lugar a fin de que, en caso de que sexa de interese para eles, iniciar os trámites para volver recuperar este topónimo”, anunciou a rexedora municipal.

Emma Álvarez explicou que “no caso de que isto vaia adiante o que temos que facer, e xa estamos traballando niso, é unha delimitación dos lugares; e o que agora mesmo son lugares, por exemplo Tercias, pasarían a ser rúas. Canedo pasaría a ocupar o sitio de lugar e os distintos barrios que hoxe coñecemos como lugares serían rúas”.

A alcaldesa tamén aclarou que esta demanda veciñal “xurde a raíz de que dende Correos están devolvendo moitas cartas por figurar o termo Canedo. E desta maneira contribuiriamos a que o servizo de Correos fora máis áxil e eficaz. Non obstante, a idea do equipo de goberno é falar con todos os afectados e facelo sempre e cando a maioría queira que isto sexa así. E nese caso, con esa delimitación dos lugares, teríamos que aprobalo en pleno e despois enviar a solicitude para que sexa aceptada polo Instituto Nacional de Estadística (INE)”.