Novas

O SALÓN DE ACTOS DO CONCELLO ACOLLERÁ MAÑÁ, XOVES, UNHA CHARLA SOBRE O CULTIVO DA FABA A CARGO DO XEFE DO LABORATORIO AGRARIO DE MABEGONDO

Lourenzá, 15 de xaneiro de 2014. O salón de actos da Casa do Concello de Lourenzá acollerá mañá, xoves, día 16 de xaneiro, ás once da mañá unha charla sobre o cultivo da faba a cargo do xefe do laboratorio agrario de Mabegondo, Jesús Collar Urquijo.

Esta actividade está organizada pola oficina agraria comarcal de Mondoñedo, dependente da Consellería do Medio Rural e do Mar, coa colaboración do Concello de Lourenzá e da cooperativa Terras da Mariña.

A ALCALDESA PARTICIPOU NA CONCENTRACIÓN CELEBRADA ESTE MEDIODÍA EN CERVO EN REPULSA Á VIOLENCIA DE XÉNERO POLO SUCESO ACONTECIDO EN SAN CIBRAO. EMMA ÁLVAREZ TRASLADOU A CONSTERNACIÓN DOS VECIÑOS DE LOURENZÁ

Lourenzá, 15 de xaneiro de 2014. A alcaldesa de Lourenzá, Emma Álvarez Chao, participou este mediodía na concentración convocada polo Concello de Cervo en repulsa á violencia de xénero polo suceso acontecido en San Cibrao no que faleceron dúas mulleres, unha nai e a súa filla.

A rexedora municipal trasladou a consternación dos veciños de Lourenzá porque o presunto homicida é natural deste municipio, concretamente da parroquia de San Adriano.

GAÑADORES CERTAME DE POESÍA DE NADAL 2013

Esta é a lista de premiados na biblioteca municipal de Lourenzá do certame local Poesía de Nadal 2013, que fixo pública o xurado do mesmo. A concelleira de Educación e Cultura, Lupe Flórez Seivane, explica que os seleccionados nesta fase local participarán na provincial que organiza a Biblioteca Provincial de Lugo para a que desexa boa sorte aos nenos/as laurentinos, todos eles alumnos do C.E.I.P. Juan Rey.

A ASOCIACIÓN DE SENDEIRISMO TERRAS DE LOURENZÁ ORGANIZA A RUTA DO FERROCARRIL (VÍA VERDE), EN A PONTENOVA, PARA O DÍA 19 DE XANEIRO

A Asociación de Sendeirismo Terras de Lourenzá bota de novo a andar no 2014. Para iniciar este novo ano vamos recorrer a Ruta do Ferrocarril (Vía Verde), en A Pontenova, unha distancia duns 12 km e de dificultade baixa. Sairemos ás 09:30 horas do Cantón de Vilanova de Lourenzá, e voltaremos para comer nas nosas casas. Recoméndase levar foco xa que hai que atravesar algún túnel.

TRAS O ÉXITO ACADADO HAI UNS DÍAS O GRUPO DE TEATRO INFANTIL DE LOURENZÁ REPRESENTARÁ DE NOVO A OBRA TELELOURENZÁ O VINDEIRO DOMINGO, 12 DE XANEIRO, ÁS SEIS DA TARDE NO SALÓN DE ACTOS DO CONCELLO

Lourenzá, 8 de xaneiro de 2014. O grupo de teatro infantil de Lourenzá representará de novo a obra TeleLourenzá o vindeiro domingo, 12 de xaneiro, ás 18 horas no salón de actos do Concello. Esta nova posta en escena está dirixida ás persoas que quedaron sen vela o pasado 5 de xaneiro, segundo explicou esta mañá a concelleira de Cultura, Lupe Flórez.