Novas

DOUS CURSOS DE APLICADOR DE PRODUTOS FITOSANITARIOS ORGANIZADOS POLO CONCELLO EMPEZAN MAÑÁ CON 60 PARTICIPANTES. ALGUNHAS PERSOAS QUEDARON EN LISTA DE ESPERA PARA OUTRO QUE SE CELEBRARÁ NOS VINDEIROS MESES

Dous cursos de aplicador de produtos fitosanitarios organizados polo Concello de Lourenzá empezan mañá, sábado, día 2. Contan con un total 60 participantes, 30 en cada un, polo que se cubriron todas as prazas que había. Ademais quedaron algunhas persoas en lista de espera para outra actividade formativa dedicada a este mesmo tema que se celebrará en Lourenzá nos vindeiros meses e para o que se seguen recollendo inscricións.

O SALÓN DE ACTOS MUNICIPAL ACOLLERÁ O 5 DE ABRIL UNHA CONFERENCIA SOBRE O ADORNO PREHISTÓRICO E AS XOIAS ÁUREAS NA ANTIGA GALLAECIA E INAUGURARASE UNHA EXPOSICIÓN DE OURIVERÍA DO MUSEO PROVINCIAL DE LUGO

O salón de actos da Casa do Concello de Lourenzá acollerá o vindeiro martes, 5 de abril, unha conferencia sobre o adorno prehistórico e as xoias áureas na antiga Gallaecia a cargo da directora do Museo Provincial de Lugo, Aurelia Balseiro García. Será ás seis da tarde e a continuación da charla inaugurarase unha exposición da colección de ourivería antiga do Museo Provincial, que estará aberta na sala de exposicións municipal ata o 2 de maio e poderá visitarse de luns a venres en horario de cinco a oito da tarde.

A ENTRADA DA CASA DO CONCELLO ACOLLEU UNHA CONCENTRACIÓN DE CONDENA DOS ATENTADOS DE BRUXELAS

Autoridades municipais, persoal do Concello e outros veciños de Lourenzá participaron nunha concentración para condenar os atentados terroristas de Bruxelas celebrada na entrada da casa consistorial.

Durante o acto os asistentes gardaron un minuto de silencio como mostra de solidariedade do pobo laurentino co belga. Ademais dende a mañá de onte as bandeiras da Casa do Concello ondean a media asta en memoria das vítimas dos atentados.